नाही रे मी कुठे रडतेय
हे अश्रूच वेड्यासारखे वाहतात
तू जातो आहेस न दूर
आपोआप बाहेर येऊन तुला पाहतात

नाही रे मी कुठे काय बोलले
हा हुंदकाच राहून राहून बोलतोय
कशी जगणार मी तुझ्याविना
माझ्या ऐवजी तोच तुला विचारतोय

नाही रे मी कुठे थांबवतेय तुला
हा हात च तुझा हात सोडत नाही
काही क्षणासाठीच चाललास न
विचारतोय तुला नाते तर तोडत नाहीस ?

नाही रे मी कुठे झालेय बेभान विरहात
हा देह च माझी साथ देत नाही
विसावालीय तुझ्या खांद्यावर मान माझी
जाण्याआधी एकदा का तुझ्या मिठीत मला घेत नाही ?