ओंजळ शब्दांची रिती रिती
मनाच्या कड्याकपार्यात
भाव नदी एक आटलेली
ओल सुगंधी मात्र अनुभूती रुक्ष आहे
....सध्या तरी कविता माझी मूक आहे

सांजवेळी परतीच्या दिशेच्या
काही रंगछटा उमलायच्या कधी
ओरखडल्या सारखे चूरगळलेले
मनाचे आकाश सध्या सांजवेळी
संवाद माझाच माझ्याशी होतो कुठ आहे ?
....सध्या तरी माझी कविता मूक आहे

अलगद सहज भेट व्हायची
माझी माझ्याशी आधी मधी
प्रत्येक भेट मग एक निमित्त व्हायचे
उसळून बहरायचे शब्दांतरी
मीच माझ्यापासून सध्या खूप जणू दूर आहे
..... सध्या तरी माझी कविता मूक आहे