भेटूनही तुला का
भेटणे तसे बाकीच उरावे
पाहूनही तुला का
पाहणे तसे बाकीच रहावे
जगणे होते या आधीही
सोबतीचे चार क्षण जणू
जगणे तसे बाकीच असावे ..

तुझ्या अत्तरी स्पर्शात
गंधाळलेले श्वास माझे
सत्यात येऊनही स्वप्न भेटींवर
धुंदीचे .आभास असावे
तुझ्या ओठांवर विरघळून हि
माझ्या ओठांवरचे ते तुषार
तहानलेलेच असावे ..

हे निमित्त कसले
तुझ्या माझ्या भेटीचे
एका सहज भेटीतून
पुन्हा पुन्हा भेटण्याचे
अनंत निमित्त फुलावे
भेटूनही कुणाला का
भेटणे तसे बाकीच असावे ..!

कधी स्पर्श शब्द झाले
कधी शब्द स्पर्श झाले
अंतर्नादातून उमटल्या
लहरींचे संवाद झाले कितीही
तरी बोलणे तुझे माझे
असे का बाकीच असावे ..!
भेटूनही कुणाला का
भेटणे तसे बाकीच असावे ..!